SERENGETI YAZINDUA MKAKATI WA KUIMARISHA UFUNDISHAJI NA UJIFUNZAJI NGAZI YA ELIMU MSINGI

Imewekwa: September 23rd, 2022

Halmashauri ya wilaya ya Serengeti imezindua Rasmi Mkakati wa  kuimarisha ufundishaji na ujifunzaji ngazi ya  elimu Msingi.Ambapo vitabu vitatu vilivyosheheni mikakati hiyo imezindulia na Katibu tawala Wilaya ya Serengeti Ndg.Qamaca C.Qamara, kwa Niaba ya Mkuu wa Wilaya  ya Serengeti.

Ikiwa ni  Takribani Mwezi Mmoja  tangu Waziri Mkuu wa Jamhuri ya Muungano wa Tanzania Mhe.Kassim Majaliwa kuzindua mkakati huo kitaifa,na hatimaye kuzinduliwa hivi karibuni  kimkoa.

Akizinduza mikakati  hiyo wa niaba ya  Mkuu wa Wilaya ya Serengeti ,Katibu tawala Wilaya amewataka wadau hao waelimu kuzingatia yote yaliyokuwepo  kwenye mikakati hiyo ili kuweza kuleta ufaulu  na mabadiliko yanayotegemewa kitaifa.

Nae, afisa elimu sekondari  Mwl.Chatta luleka  Amesema kwamba Ofisi ya Rais – TAMISEMI yenye jukumu la kusimamia na kufuatilia utekelezaji wa sera miongozo ya Elimu ya Msingi na Sekondari imetoa mikakati  ya kuimarisha ufundishaji na ujifunzaji kwa ngazi ya Elimu Msingi ambapo Mkakati huo umegawanyika katika sehemu tatu, sehemu ya kwanza inaonesha mkakati wa kuimarisha ufundishaji na ujifunzaji ngazi ya Elimu Msingi, sehemu ya pili  ni changamoto katika uboreshaji Elimu Msingi na Sekondari na hatua za kuchukua na sehemu ya tatu inaonesha uteuzi wa viongozi Elimu wa ngazi zote kuanzia katika shule hadi Mkoani.

Ameongeza pia  Lengo kuu la sehemu ya kwanza ya mkakati ni kuimarisha uandikishaji, ufundishaji na ujifunzaji ngazi ya Elimu Msingi.

‘’ Utekelezaji wa mkakati huo  unaongozwa na nadharia ya mabadiliko (Theory of change),  katika nadharia hiyo hatua ya kwanza ni kuchambua hali halisi ya tatizo ambalo huanza na viashiria vya tatizo, visababishi vya tatizo na athari za tatizo. Hatua ya pili ni kutafuta namna ya kukabili tatizo hilo kwa kuangalia fursa zilizopo katika mazingira ya fursa zilizopo mazingira ya tatizo ambazo zinaweza kutumika kutafuta tatizo husika. Hatua ya tatu ni kupanga mikakati ya kutumia fursa zilizopo kutatua tatizo ikiwa ni pamoja na kupanga utekelezaji wa mkakati, ufuatiliaji na  kufanya tathimini endelevu na tathimini tamati‘’Alisema Luleka

Aliongeza kwa kusema Sehemu ya pili ni uboreshaji wa Elimu Msingi na sekondari na hatua za kuchukua sehemu hii  inaonesha maboresho ya mifumo ya ufuatiliaji na usimamizi wa utoaji huduma yaliyofanywa, hali ya utoaji wa Elimu msingi na changamoto za uboreshaji wa Elimu na utatuzi wake na Sehemu ya tatu na ya mwisho ni uteuzi wa viongozi wa Elimu wa ngazi zote kuanzia ngazi ya shule, Kata, Halmashauri na Mikoa. Eneo hili limebainisha nafasi, sifa za kimuundo na kiutendaji, muundo wa kamati za mapendekezo ya uteuzi zitakavyofanya uchambuzi na kuwasilisha mapendekezo yake kwenye Mamlaka ya uteuzi.  Eneo hili lina sehemu tano, ambapo sehemu ya kwanza ni Mamlaka ya uteuzi wa viongozi, sehemu ya pili ni sifa za viongozi, sehemu ya tatu ni utaratibu wa uteuzi, sehemu ya nne ni uendeshaji wa kamati za mapendekezo ya uteuzi na sehemu ya tano ni majumuisho

Kuwepo kwa mkakati kutasaidia kwa kiasi kikubwa kupunguza na kundoa changamoto mbalimbali katika sekta ya elimu Msingi wilayani Serengeti.