Serengeti yaongoza kitaifa utoaji wa mikopo kwa wanawake na vijana.

Imewekwa: December 28th, 2017

Halmashauri ya wilaya ya Serengeti yapongezwa kuongoza kitaifa katika utoaji wa mikopo kwa wanawake na vijana kutoka vyanzo vya mapato ya ndani.

Pongezi hizo zimetolewa leo tarehe 28 Disemba 2017 na Mkuu wa Wilaya ya Serengeti Mheshimiwa Nurdin Babu alipokuwa akizindua Jukwaa la uwezeshaji wanawake kiuchumi pamoja na mafunzo ya ujasiliamali kwa vikundi vya wanawake na vijana katika ukumbi wa Halmashauri.

Mkuu wa Wilaya ya Serengeti, Mheshimiwa Nurdin Babu

“Nawapongeza viongozi na watendaji wa Halmashauri kwa kutoa mikopo kwa wanawake na vijana na kufanikiwa kuongoza kitaifa, tuendelee kutenga fedha za mikopo kulingana na makusanyo yetu” amesema Mheshimiwa Babu.

Aidha Mheshimiwa Babu amewataka madiwani wote kuchochea maendeleo katika Kata zao kwa kuwahamasisha wananchi kuunda vikundi vya wajasiliamali ili kuweza kupatiwa mikopo.

Mwenyekiti wa Halmashauri ya Wilaya ya Serengeti, Mheshimiwa Juma Porini

Naye Mwenyekiti wa Halmashauri Mheshimiwa Juma Porini amesema Halmashauri hutenga asilimia kumi ya mapato yake ya ndani kutoka vyanzo vyake vya ndan vya mapato kwa ajili ya mikopo hiyo huku akitaka vikundi vitumie fedha hizo kuchochea maendeleo kwa wananchi wa Wilaya ya Serengeti. “Kwa mwaka wa fedha 2016/17 Halmashauri yetu imeweza kutoa mikopo yenye thamani ya Tshs 220,000,000 kwa vikundi vya wanawake 43 na vijana 32” alisema Mheshimwa Porini.

 Jumla ya Tshs 103,000,000 zimetolewa kwa vikundi vya wanawake na vijana huku Tsh 63,000,000 ikiwa imetolewa kwa vikundi 20 vya wanawake na Tshs 40,000,000 kwa vikundi 11 vya vijana.

Mbunge wa Jimbo la Serengeti, Mheshimiwa Marwa Ryoba

Aidha Mbunge wa jimbo la Serengeti ameipongeza Halmashauri kwa kuongoza kitaifa katika utoaji wa mikopo huku akiviahidi vikundi vya wajasiliamali kupatiwa misaada zaidi ya elimu ya ujasiliamali na mikopo.  

Katika mafunzo ya ujasiliamali yaliyokuwa yakitolewa na Idara ya maendeleo ya Jamii Bwana Sunday Wambura Afisa Maendeleo ya Jamii amewataka wanufaika wa mikopo hiyo kuitumia katika shughuli za maendeleo huku akivihimiza vikundi kuanzisha viwanda vidogo dogo ambavyo gharama yake ni ndogo.

“Katika mwakawa fedha 2017/18 Halmashauri yetu imejipanga kutoa awamu mbili za mikopo kwa vikundi vya wanawake na vijana. Leo tunatoa awamu ya kwanza na tutatoa tena awamu nyingine kabla ya kufunga mwaka wa bajeti 2017/18” alisema Bwana Wambura.

Vikundi vya wanawake wajasiliamali wakiwa katika mafunzo

Wanawake na vijana wakiwa katika mafunzo ya ujasiliamali katika ukumbi wa Halmashauri