RC MTANDA AIPONGEZA SERENGETI DC KWA UTEKELEZAJI WA AGIZO LAKE

Imewekwa: August 3rd, 2023

Mkuu wa Mkoa wa Mara Mhe. Said Mtanda ameipongeza Halmashauri ya Wilaya ya Serengeti kwa kutekeleza agizo lake la kufanya matengenezo ya magari yaliyokuwa yamekaa muda mrefu bila matengenezo

Akitoa pongezi hizo leo alipofanya ziara katika Halmashauri hiyo Mhe.Mtanda amesema ufufuaji wa magari hayo utaongeza chachu ya usimamizi na ufuatiliaji wa miradi mbalimbali ndani ya Wilaya

"hakuna haja ya magari kulala, serikali inaleta fedha nyingi za maendeleo Sasa endapo hatutakuwa na vitendea kazi vya kufika kwenye miradi kazi haiwezi kufanyika" alisema Mtanda

Aidha Mhe. Mtanda ametoa rai kwa Halmashauri zote mkoani Mara kuhakikisha wanatekeleza maagizo yote  yaliyotolewa kwa haraka

"Wilaya nyingine nitafanya ziara, kabla ya shughuli nyingine kwanza ni kukagua maelekezo niliyoyatoa wakati nafanya ziara ya kwanza" aliongeza Mtanda

Halmashauri ya Wilaya ya Serengeti imetekeleza agizo la Mkuu wa Mkoa huyo alilotoa Juni 17, 2023 kwa kufufua magari yaliyokuwa yamekaa muda mrefu bila matengenezo.