MALIPO YA UHAMISHO KWA WALIMU WA SHULE MPYA YASUBIRIA FEDHA ZA RUZUKU

Imewekwa: April 24th, 2019

Kaimu Mkurugenzi Mtendaji wa Wilaya ya Serengeti Bi. Rebeca Msambusi amewataka walimu wote waliohamishiwa katika shule mpya za Sekondari kuwa na subira juu ya stahiki zao za uhamisho.

Ameyasema hayo leo katika kipindi cha maswali ya papo kwa papo wakati  wa ufunguzi wa Mkutano wa kawaida wa baraza la Madiwani, mkutano ambao ni wa robo ya tatu kwa mwaka wa fedha wa 2018/2019

Kabla ya kujibu swali hilo la msingi kutoka kwa Mh. Diwani wa Kata ya Sedeco, Bi. Rebeca alianza kwa kuwashukuru Waheshimiwa madiwani kwa ushirikiano wao.

“Tunawashukuru waheshimiwa madiwani ambao wameshirikiana kwa ukaribu na menejimenti kuhakikisha zile shule saba mpya za sekondari zinakamilika na kuweza kufunguliwa” amesema Bi. Rebeca

Akizungumzia juu stahiki za uhamisho amesema kuwa shule hizo zilikuwa zimeshafunguliwa na ilikuwa ni lazima kuwapeleka walimu ili ziweze kufanya kazi.

“Lakini baada ya kufunguliwa ilibidi tupeleke walimu ili zianze kufanya kazi ni dhahiri Muheshimiwa Mwenyekiti tunatambua stahiki zao na zimeshafanyiwa hesabu na zinafahamika katika Menejimenti na kinachobakia sasa hivi tunasubiria fedha za ruzuku tuweze kuwalipa” Alijibu Bi Rebeca

 Kwa mwaka wa fedha 2018/2019 Halmashauri imeweza kukamilisha na Kuzifungua shule mpya saba (7) ambapo walimu wapatao 37 waliamishishiwa katika shule hizo mpya na kwa ujumla walimu hao wanadai jumla ya Tsh. 93,000,000/= (Milion tisini na tatu) ikiwa ni stahiki zao za uhamisho kwenda katika vituo hivyo vipya.